Ngud ni Irvin Sto. Tomas

Nganud bayá ngud
'baad mailúd
mu kan'kung likúd
bagu maglawúd.
San daydáy ingúd

Kawat ni Jimple Borlagdan

Muya takang matehon.
Inda kun anong pagmati ini,
pero muya kong magdama kita
bago ta gibuhon.

Muya takang kaonon
an mga pidaso mo, diit-diit.
Pasiring sa sagkodan
kan saimong kampo,
an pigsasagang mo
kan saimong mga piyesa.

Hali duman, matindog ako.
Tutuhugon ko an saimong mga armas
sa sarong mapanas na ruso.
Sususugon taka sa sako
sagkod sa maubos ka
sagkod sa dai ka nang pan-ulang
sagkod sa maubos an saimong dulagan.

Mamatehon taka, muya ko.
Saka mo ako hihilingon sa mata.
Mamamate mo an lipot kan panahon.
Sa hinang mo ihihinghing ko
na magayon magpuon na bagong kawat
sa irarom kan tamong.

12-28-08. Karangahan.

Ano daw idtong sa gogon? ni Kristian Cordero

Ta nahiling ko idtong sa gugon

kan ako sinugo na magtugon.

Naglakaw, halabaon su mingkog

nagsunod, idong putol an ikog.

Kan may nahiling na naghihiro

na garo nag-aapod na muro

dinulok ko asin hiniling,

ay! huba, naibabawan si manay:

pigsusuag nin ibang damulag.

Garo sinda mga nakadulag

na hayop sa kadlagan, makusogan paghiro, pigpupugol an tingog.

Sa angog bulawan na an ganót—

Ay, nakakan ko gabos na bangot!

Kin Gab-i ni Irvin Sto. Tomas

Bagu kitá bumatáng syertuhún
mu sanáng tultul kang nakakaún
ta kin nganud iká pag-alupún
dirí mu ná aku paggisungún
agúm, habû na kung dayukdukún
ka mga pangatur'gán mung itún!

Dumog ni Richard Madrilejos

May babaye, uyam,
naghahalat masindihan,
an sigarilyong kasubago pa ugom,
dumog na an enotan ka ini.

May lalake, dai ma pa huntok,
nagduduwang isip,
kun sisindihan pa an sigarilyong ugom kan babaye,
dumog na an enotan kaini.

May saro pang lalake, halop,
pirit marumdoman,
an pangsinde,
dumog na an enotan ka ini.

An pangsinde, dagit,
naghahalat isinde,
sa sigarilyong ugom kan babaye,
dumog na an enotan kaini.

Palatog 1 ni Jimple Borlagdan

Butones kada butones, muya kong ubakan an pagkahipid mo,
kamangon an saimong tadong. An saimong taklob, bubukliton ko
luway-luway, arog sa marindihon na dahon kan suanoy na libro.

Muya kong hubadon an saimong pagkahigot
nganing sumayaw kang pisi sa paros, naghahagong
sa wasiwas kan rantserong mamundo.

Higuton ka, arog kan pagkahusto kan balat mong sapatos
sa nakatago mong bitis. Kaipuhan takang labunan,
sa init pauriyakon an saimong unit ki mga pirak na pisog.

Nakamaan ako ngonian sa mabuot na pakihuron kan saimong lawas
na nagtataram na “dai mo ako pagparamaanan.” Pano man,
kun riraw an masupgon mong tukadon na sinamnohan sa marindihon na telang burakan?

Garo ka gibo sa paros na pinatos sa badong matagas.
Muya kong buhian an saimong misteryo sa kinaban, arog kan sarong makapatod-hangos na tanawon,
arog kan Mayon muya ko sanang lanyagon kan sildang an mapungaw mong kadlagan.